أغني وطنية
بلادي انا

بلادي يابلادي اهلا يا بلادي

الف تحية ليكي من الفؤادي

بلادي بلادي اهلا يا بلادي

صدورنا حماية ليكي من الاعادي

بلادي انا بلاد ناسا مواريثم في اول شي كتاب الله

وخيل مشدود وسيف مسلول حداهو درع

تقاقيبن تسد الليل مع الحيران وشيخا في الخلاوي ورع

والله كم نخلاتا تهبهب في جروفا الساقية

بقرة حلوبة تتضرع وليها ضرع

وساقية تصحي الليل مع الفجراوي

يبكي الليل ويدلق في جداولو دمع

يخدر في بلادي سلام

خدرة شاربة موية النيل

تزغرد في البوادي زرع

بلادي سهول بلادي حقول

بلادي الجنة للشافوها او للبرّة بيها سمع

بلاد ناسا تكرم الضيف

حتى الطير يجيها جعان ومن اطراف تكيها شبع

تشيل الناس وكل الناس وسع بي خيرو لينا يسع

وتدفق مياه النيل على الخيران

بياض الفضة في وهج الهجير بيشع

بلادي الصفقة والطنبور

داراةً تنح باليل

بنوتا تحاكي الخيل

تشابن زي جدي الريل

وشبالا مكتل في الطريفو ودع

بلادي بلاد من التاريخ

من تيرهاقا لا عن ميسنا

حتى ان جاي خيرو تروع

بلادي امان بلادي حنان وناسا حُنان

يكفكفوا دمعة المفجوع

يحبوا الدار

يموتوا عشان حقوق الجار

يخوضو النار عشان فد دمعة

كيف الحال لو شافوها سايلة دموع

ديل اهلي ديل اهلي

يبدو الغير علي زاتم

يقسموا اللقمة بيناتم

يدو الزاد حتى ان كان مصيرم جوع

ديل اهلي البقيف في الدارة وسط الدارة واتنبر واقول الدنيا ديل اهلي

عرب ممزوجة بي دم الزنوج الحارة

ديل قبيلتي لمن ادور افصل ديل فصلي

اصحاب روحي والإاحساس وسافر في بحار شوقم زمان عقلي

اقول بعضي الاقيهم تسربو في مسارب الروح

بقو كلي

محل قبلت القاهم معاي معاي زي ضلي

وكان ما جيت من زي ديل واسفاي وا ماساتي وا زّلي

تصور كيف يكون الحال لو ماكنت سوداني

واهل الحارة ما أهلي.